मकवानपुरको मनहरी गाउँपालिका ६ रुपाचुरीमा रहेको सगरमाथा आधारभुत विद्यालयको भवन निर्माणका लागि बिल्डिङ एजुकेसन र मनहरी गाउँपालिकाबीच सम्झौता भएको छ । विद्यालयमै पुगेर गाउँपालिका अध्यक्ष रञ्जन कालाखेती र बिल्डिङ एजुकेसनका संस्थापक क्यान्डीको बीचमा सम्झौता भएको हो ।
-------------- बिज्ञापन ---------------
तामाङ र चेपाङ समुदायका बालबालिका अध्ययनरत विद्यालयमा कक्षाकोठाको अभाव रहँदै आएकोले भवन निर्माण हुन लागेको हो । बिल्डिङ एजुकेसनले ५ कोठे भवन निर्माण गर्ने सम्झौतामा उल्लेख छ । ८ कक्षासम्म अध्ययन हुने विद्यालयलाई माध्यमिक तहको बनाउने तयारी रहेको छ । बिल्डिङ एजुकेसनका संस्थापक क्यान्डीले विद्यालयको भवन बनाउने विषयमा गाउँपालिकासँग सहकार्य गर्न पाएकोमा खुसी व्यक्त गरिन् ।
अब निर्माणकोे काम समेत सुरु गरिहाल्ने उनको प्रतिबद्धता रहेको थियो । मनहरी गाउँपालिकासँगको सहकार्यलाई जारी राख्ने उनले बताइन् । यता मनहरी गाउँपालिकाका अध्यक्ष रञ्जन कालाखेतीले विद्यालयको लागि प्रयोग हुने ढुङ्गा, गिटी, वालुवामा कर छुट गरिने जानकारी दिँदै विद्यालयको स्तरोन्नतीका लागि पालिकाको तर्फबाट सहयोग गर्ने प्रतिबद्धता जनाए । उनले मनहरी गाउँपालिकाको शिक्षा र स्वास्थ्य क्षेत्र सुधारका लागि योजनाबद्ध काम गरिरहेको जानकारी दिए । सगरमाथा आधारभुत विद्यालयमा २९४ विद्यार्थी अध्ययनरत रहेका छन् ।
कार्यक्रममा दीर्घ नेपालका संयोजक ज्योति बानियाँ, बिल्डिङ एजुकेसनको नेपालका लागि संयोजक दिवेश गिरी, स्रोत शिक्षक विदुर थापा सहित जनप्रतिनिधिहरुको उपस्थिती रहेको थियो ।
