माध्यमिक शिक्षा परीक्षा (एसईई) को परीक्षामा मकवानपुरबाट २ हजार ९८ जना विद्यार्थी कक्षा ११ भर्ना हुन योग्य भएका छन् । राष्ट्रिय परीक्षा बोर्डले सार्वजनिक गरेको नीिजा अनुसार मकवानपुर जिल्लाबाट एसईईमा सहभागी ५ हजार ७ सय ५२ परीक्षार्थीमध्ये २ हजार ९८ जना विद्यार्थी ११ कक्षा भर्ना हुन योग्य भएका हुन् ।
-------------- बिज्ञापन ---------------
शिक्षा विकास तथा समन्वय इकाई मकवानपुरका अनुसार यो ३६ दशमलव ४७ प्रतिशत हो । मकवानपुरको नतिजा राष्ट्रिय भन्दा पनि कमजोर देखिएको छ । मकवानपुर जिल्लाबाट एसईईमा सहभागी ३ हजार ६५४ जना विद्यार्थी कक्षा ११ भर्ना हुन नपाउने भएका छन् ।
मकवानपुरबाट जीपीए ३ दशमलव ६ देखि ४ सम्म हाँसिल गर्ने २ सय ५८ जना, जीपीए ३ दशमलव २ देखि ३ दशमलव ६ हाँसिल गर्ने ५९२ जना, जीपीए २ दशमलव ८ देखि ३ दशमलव २ हाँसिल गर्ने ७६५ जना, जीपीए २ दशमलव ४ देखि २ दशमलव ८ हाँसिल गर्ने ४५१ जना, जीपीए २ दशमलव ० देखि २ दशमलव ४ हाँसिल गर्ने ३२ जना रहेको शिक्षा विकास तथा समन्वय इकाई मकवानपुरले जनाएको छ ।
गत चैत १५ गते सुरु भएर चैत २७ गते एसईई सकिएको थियो । एसईईमा एउटा विषयमा मात्रै ननग्रेडेड भएका विद्यार्थी ७३० जना र २ वटा विषयमा ननग्रेडेड भएका विद्यार्थी ६२५ जना रहेका छन् । २ वटा विषयसम्म ननग्रेडेड हुने विद्यार्थीले ग्रेड वृद्धिका लागि मौका परीक्षा दिन पाउनेछन् । राष्ट्रिय परीक्षा बोर्डले आगामी साउन १८ र १९ गते ग्रेडवृद्धि परीक्षा लिने भएको छ ।
