मकवानपुरको बकैया गाउँपालिकाको कार्यालयमा नेकपा एमाले र नेकपा माओवादीका कार्यकर्ताहरुले तालाबन्दी गरेका छन् । कर्मचारी सरुवा तथा बढुवाको विषयलाई लिएर शुक्रबार गाउँपालिकाका उपाध्यक्ष भक्तबहादुर खत्रीकै नेतृत्वमा तालाबन्दी भएको हो ।
-------------- बिज्ञापन ---------------
गाउँपालिका अध्यक्ष धर्मराज लामिछानेले चित्त बुझ्ने गरी काम नगरेकोले ताला लगाइएको उपाध्यक्ष खत्रीले बताएका छन् । उनले अध्यक्ष लामिछानेले विवादास्पद निर्णय गरेको समेत आरोप लगाए ।
यस विषयमा गाउँपालिका अध्यक्ष धर्मराज लामिछानेले भने आफुले सफा भावनाका साथ काम गरिरहेको बताएका छन् । उनले राजनीतिक स्वार्थबाट प्रेरित भई तालाबन्दी गर्ने कार्य भएको बताए ।
बकैया गाउँपालिकाको सामाजिक र स्वास्थ्य शाखाको जिम्मेवारी छैठौँ तहका फटिकरमण प्याकुरेलले सम्हाल्दै आएका थिए । तर, प्याकुरेललाई दुई वटा शाखाको जिम्मेवारी रहेको भन्दै गाउँपालिकाले छैठौँ तहकै रमेश फुयाँललाई स्वास्थ्य शाखाको जिम्मेवारी प्रदान गर्ने तयारी गरेको थियो ।
