मकवानपुरमा मुस्लिम समुदायले आयोजना गरेको प्रदेश प्रमुखहरुको स्वागत तथा सम्मान कार्यक्रम सम्पन्न भएको छ ।
-------------- बिज्ञापन ---------------
मकवानपुरका मुस्लिम समुदायले हेटौंडा –४ मा रहेको जामे मस्जिदमा सोमबार एक कार्यक्रमको आयोजनामा गरी दुई प्रदेश प्रमुखको स्वागत तथा सम्मान गरेको हो ।
मुस्लिम समुदायले बागमती प्रदेश प्रमुख दीपकप्रसाद देवकोटा र सुदुरपश्चिम प्रदेशका प्रदेश प्रमुख नजिर मियाको स्वागत गरेको हो ।
सो क्रममा बागमती प्रदेशका प्रदेश प्रमुख देवकोटाले आपसी भाइचारा र मेलमिलापले खुसी र समृद्धि ल्याउने बताए । नेपाल एक धर्म निरपेक्ष मुलुक रहेको स्मरण गर्दै उनले संविधानको प्रस्तावनामै विविधतालाई आत्मसात् गरिएको उनले बताए ।
उनले आफ्ना स्वतन्त्रता प्रयोग गर्दा अरूको स्वतन्त्रता हनन् हुन दिएनौ भने मात्रै पनि समाज सभ्य र सु–संस्कृत हुने उल्लेख गरे ।
यस्तै, सो क्रममा सुदूरपश्चिम प्रदेशका प्रदेश प्रमुख मियाले सम्पूर्ण मुस्लिम समुदाय एक ढिक्का हुनुपर्ने बताउँदै हक अधिकारको लागि हातेमालो गरेर अगाडि बढेमात्रै पहिचानसहितको अधिकार प्राप्त गर्न सकिने उल्लेख गरे ।
कार्यक्रम अगुवा महमद समिम खानको सभाध्यक्षतामा भएको हो । कार्यक्रममा एकै मञ्चमा दुवै प्रदेशका प्रदेश प्रमुखलाई राखेर स्वागत तथा सम्मान गरिएको थियो ।
