मकवानपुरको मनहरी गाउँपालिकामा  शिक्षक भलिबल प्रतियोगिताको आयोजना भएको छ । शिक्षकहरुको क्षमता विकाससँगै खेलकुदलाई बढावा दिने उद्देश्यले आयोजित भलिबल प्रतियोगिताको फाइनलमा ३ र ४ नम्बर वडा प्रवेश गरेका छन् ।

-------------- बिज्ञापन ---------------

प्रतियोगितामा प्रत्येक वडाको एक÷एक टिम र ६ नम्बरको २ वटा गरी १० टिमको सहभागिता रहेको थियो । सेमिफाइनलमा ३ नम्बरले ७ लाई २५–१९, २५–२७ र १५–११ को सेटमा हराउँदै फाइनल प्रवेश गरेको हो ।

४ ले ८ नम्बरलाई २५–१३ र २५–१६ को सोझो सेटमा हराउँदै उपाधि भिडन्त पक्का गरेको हो । ३ नम्बर वडा अध्यक्ष समेत रहेका गाउँपालिकाका सामाजिक विकास समिति संयोजक अनन्तप्रकाश अर्यालको अध्यक्षतामा भएको प्रतियोगिताको उद्घाटनमा पालिका अध्यक्ष रञ्जन कालाखेतीको प्रमुख आतिथ्यता रहेको थियो ।

अध्यक्ष कालाखेतीले शिक्षकहरुलाई पढाईसँगै खेलकुदमा समेत जोड्ने उद्देश्यले भलिबलको आयोजना गरिएको बताए । यस प्रतियोगितालाई प्रत्येक वर्ष निरन्तरता दिने योजना रहेको उनको भनाई थियो । शिक्षकहरुले खेल्दा विद्यार्थीलाई समेत हौसला मिल्ने कालाखेतीको दावी थियो ।

प्रतियोगिताको उद्घाटनमा उपाध्यक्ष सीता पुलामी मगर, ७ नम्बर वडा अध्यक्ष ठाकुरराम तितुङ, ८ नम्बर वडा अध्यक्ष नारन उप्रेती लगायतको आतिथ्यता रहेको थियो ।

प्रतियोगिताको फाइनल खेल १४ गते हुने गाउँपालिकाका स्रोत शिक्षक विदुरविक्रम थापाले जानकारी दिए । मनहरीमा शनिबारबाट राष्ट्रपति रनिङशिल्ड छनौट प्रतियोगिता समेत हुँदैछ ।