हेटौंडा राउन्ड टेवल संस्थाले मकवानपुरको मनहरी गाउँपालिका ३ सिद्धकालीमा रहेको प्रजा आधारभूत विद्यालयका विद्यार्थीलाई न्यानो कपडा (स्वीटर) सहयोग गरेको छ ।
-------------- बिज्ञापन ---------------
अधिकांश आदिवासी जनजाती र दलित समुदायका विद्यार्थी अध्ययनरत विद्यालयका सबै ३२४ विद्यार्थीलाई स्वीटर सहयोग गरिएको हो । बुधबार एक कार्यक्रमकाबीच विद्यार्थीलाई स्वीटर हस्तान्तरण गरिएको हो । कार्यक्रम संयोजक राहुल जालानको संयोजकत्व एवम् विद्यालय व्यवस्थापन समिति अध्यक्ष हिराबहादुर प्रजाको अध्यक्षतामा भएको स्वीटर वितरण कार्यक्रममा मनहरी गाउँपालिकाका अध्यक्ष रन्जन कालाखेतीको प्रमुख आतिथ्यता रहेको थियो ।
हेटौंडा राउन्ड टेवलका अध्यक्ष सुदिप गुप्ताले अधिकांश जनजाती र दलित तथा विपन्न समुदायका विद्यार्थी रहेकोले यो जाडोमा सहयोग गरिएको बताए । ‘यो जाडोमा धेरै विद्यार्थी न्यानो कपडा बिनै पढ्न आउने गरेको र सहयोग जरुरी रहेको जानकारी पाएपश्चात स्वीटर वितरणका लागि आएका हौं’, अध्यक्ष गुप्ताले भने ।
यता मनहरी गाउँपालिकाका अध्यक्ष कालाखेतीले आफ्नो पालिकाको एउटा विद्यालयका सबै विद्यार्थीलाई न्यानो कपडा सहयोग गरेकोमा धन्यवाद व्यक्त गरे । सहयोगापेक्षीलाई सक्नेले सहयोग गर्नु पुण्यको काम भएको उनको भनाई थियो । यो सहयोगले प्रजा आधारभूत विद्यालयका विद्यार्थीको पढाईमा सहयोग पुग्ने अध्यक्ष कालाखेतीको विश्वास थियो ।
मनहरी ३ नम्बर वडा अध्यक्ष अनन्तप्रकाश अर्यालले आगामी दिनमा पनि यस्तै सहयोगको अपेक्षा गरे । कार्यक्रम संयोजक जालानले साँच्चै सहयोग चाहिएको विद्यालयमा सहयोग गर्न पाएकोमा खुसी व्यक्त गर्दै आगामी दिनमा पनि सक्दो सहयोग गर्ने प्रतिबद्धता जनाए । विद्यालयका प्रधानाध्यापक तुलबहादुर सुनारका अनुसार १ देखि ८ कक्षासम्म अध्ययन हुने यस विद्यालयमा ३२४ जना विद्यार्थी छन् । सहयोग हस्तान्तरणमा मनहरी १ नम्बर वडा अध्यक्ष शिवप्रसाद खनाल, युवा समाजसेवी श्रीराम खड्का, प्रसुज मैनाली लगायतको आतिथ्यता थियो ।
