मकवानपुर, फागुन १— बागमती प्रदेशको राजधानी हेटौंडा उपमहानगरपालिका बालमैत्री स्थानीय शासनयुक्त उपमहानगरपालिका घोषणा गरिएको छ । हेटौंडा उपमहानगरपालिका बालमैत्री घोषणा गर्नेमा मकवानपुर जिल्लाको चौथो पालिका भएको छ ।

-------------- बिज्ञापन ---------------

बिहिवार उपमहानगरपालिकाको ५६ औं स्थापना दिवसको अवसरमा हेटौंडा–५, स्थित पिप्ले क्याम्पा रंगशालामा सरकारका उपप्रधान तथा सहरी विकास मन्त्री प्रकाशमा सिंहले हेटौंडालाई पुर्ण रुपमा बालमैत्री घोषणा गरेका हुन ।

बालमैत्री घोषणा कार्यक्रमको सम्बोधन गर्दै उपप्रधानमन्त्री सिंहले समाजमा रहेका कुरिती हटाउन अघि बढेको हेटौंडा उपमहानगरपालिका बालमैत्री स्थानीय शासन युक्त घोषणा गर्न सफल भएको बताए । नगरपालिकाहरुमध्ये बागमती प्रदेशको राजधानी भएका कारणले पनि हेटौंडा महत्वपुर्ण उपमहानगरपालिका भएको उनले बताए ।

यसैगरी कार्यक्रममा बोल्दै बागमती प्रदेशका कार्यबहाक मुख्यमन्त्री प्रकाश श्रेष्ठले हेटौंडा उपमहानगरपालिकालाई महानगर बनाउने आफुहरुको सपना रहेको बताए ।

घोषणाका लागि आवश्यक ५१ सूचक मध्ये हेटौंडा उपमहानगरपालिकाले ४३ सूचकमा सतप्रतिशत नतिजा प्राप्त गरेको नगर उपप्रमुख राजेश बानिंयाले बताए । १९ वटा वडा रहेको यस उपमहानगरपालिकामा १८ वर्षमुनिका ५० हजार १ सय ९५ बालबालिका रहेका छन् । ३६ हजार ८ सय २२ घरधुरी रहेको उपमहानगरपालिकामा १ लाख ७६ हजार १ सय ६३ जनसंख्या रहेको छ ।

यसअघि मकवानपुरगढी गाउँपालिका, मनहरी गाउँपालिका र बकैंया गाउँपालिका बालमैत्री पालिका घोषणा भइसकेका छन् ।