नेपालका सिएम पुरुषोत्तम सिलवालले द वेस्टर्न एशियन जुनियर चेस च्याम्पियनसिपमा द्रुत गतिको ब्लिट्जमा रजत पदक जितेका छन् । श्रीलङ्कामा सम्पन्न द्रुत गतिको ब्लिट्जमा आठौं वरियताका २१३० रेटेड पुरुषोत्तमले अन्तिम चरणमा प्रतियोगिताकै शीर्ष खेलाडी भारतका २३७९ उच्च रेटेड आइएम मायाङ्क चक्रवर्तीलाई पराजित गरेका हुन ।
-------------- बिज्ञापन ---------------
पुरुषोत्तमले सात मध्ये छ खेलमा जित निकालेका थिए । उनले बङ्गलादेशका २१४२ रेटेड आइएम मनून रेजानिरसँगको एक खेल गुमाए थिए। विश्व बुद्धिचाल महासङ्घ तथा एशियन चेस फेडरेसनको तत्वावधानमा श्रीलङ्का चेस फेडरेसनले जुन ४ देखि १२ तारिखसम्म आयोजना गरेको द वेस्टर्न एशियन जुनियर चेस च्याम्पियनसिप भएको हो ।
नेपाल बुद्धिचाल महासङ्घका अनुसार प्रतियोगितामा आयोजक राष्ट्र श्रीलङ्कासहित नेपाल, बङ्गलादेश, भारत, काजकिस्तान, माल्दिभ्स, रसिया, तुर्कमिनिस्तान र उज्वेकिस्तान गरी नौ वटा देशका ५९ जना खेलाडीको सहभागिता थियो ।
