काठमाडौं । प्रधानमन्त्री सुशीला कार्कीले आगामी प्रतिनिधिसभा निर्वाचनको तयारी र सुरक्षाका विषयमा बोलाएको सर्वदलीय बैठक बालुवाटारमा जारी छ । प्रधानमन्त्रीको सरकारी निवासमा सुरु भएको बैठकमा राजनीतिक दलका शीर्ष नेताहरू सहभागी छन् ।
-------------- बिज्ञापन ---------------
आगामी फागुन २१ गतेका लागि तोकिएको प्रतिनिधिसभा निर्वाचनको सम्भाव्यता र सुरक्षाबारे दलहरूबीच मतभेद बढिरहेका बेला प्रधानमन्त्री कार्कीले पहिलो पटक सामूहिक छलफल आयोजना गरेकी हुन् । जेन–जी आन्दोलनको जगमा प्रधानमन्त्री बनेपछि उनले आयोजना गरेको यो पहिलो सर्वदलीय बैठक हो ।
बैठकमा प्रमुख प्रतिपक्षी नेकपा (एमाले) ले निर्वाचन हुन नसक्ने भन्दै संसद् पुनःस्थापनाको माग गरिरहेको सन्दर्भमा प्रधानमन्त्रीले साझा धारणा बनाउन संवाद थालेकी हुन् ।
छलफलमा नेपाली कांग्रेसबाट महामन्त्री गगन थापा र प्रवक्ता डा. प्रकाशशरण महत, एमालेबाट महासचिव शंकर पोखरेल र उपमहासचिव प्रदीप ज्ञवाली, माओवादी केन्द्रबाट वर्षमान पुन र पम्फा भुसाल सहभागी छन् ।
त्यसैगरी, राष्ट्रिय स्वतन्त्र पार्टी (रास्वपा) बाट उपसभापति स्वर्णिम वाग्ले र सोविता गौतम, राष्ट्रिय प्रजातन्त्र पार्टी (राप्रपा) बाट राजेन्द्र गुरुङ र मोहन श्रेष्ठ, जनता समाजवादी पार्टी (जसपा) नेपालबाट अध्यक्ष उपेन्द्र यादव र प्रकाश अधिकारी उपस्थित छन् ।
एकीकृत समाजवादीबाट राजेन्द्र पाण्डे र प्रकाश ज्वाला, लोकतान्त्रिक समाजवादी पार्टी (लोसपा) बाट सर्वेन्द्रनाथ शुक्ल, नागरिक उन्मुक्तिबाट रेशम चौधरी, नेमकिपाबाट प्रेम सुवाल र जनमत पार्टीबाट चन्दन सिंह पनि बैठकमा सहभागी छन् ।
सरकारका तर्फबाट प्रधानमन्त्री कार्कीसँगै गृहमन्त्री ओमप्रकाश अर्याल, अर्थमन्त्री रामेश्वर खनाल, ऊर्जामन्त्री कुलमान घिसिङ, कृषिमन्त्री मदन परियार र प्रधानमन्त्रीका प्रमुख सल्लाहकार अजयभद्र खनाल बैठकमा उपस्थित छन् ।
बैठकमा निर्वाचन सुरक्षाको तयारी, दलहरूबीचको समन्वय र राजनीतिक स्थायित्वका लागि सहमतिको आधार तयार गर्ने विषयमा विस्तृत छलफल भइरहेको प्रधानमन्त्रीको सचिवालयले जनाएको छ ।
