हेटौँडा उपमहानगरपालिका–१० नम्बर वडा कार्यालयको आयोजनामा तेस्रो घरेलु उत्पादन प्रवर्द्धन प्रदर्शनी तथा नृत्य प्रतियोगिता आउँदो १६ र १७ गते दुई दिन सञ्चालन हुने भएको छ। हेटौँडाका १९ वटै वडाको सहभागितामा हुने मेलामा घरेलु उत्पादनको प्रदर्शनी, कृषि सामग्री, स्थानीय पर्यटन तथा खानाका स्टल, सांगीतिक प्रस्तुति र नृत्य प्रतियोगिता समावेश रहनेछ।
-------------- बिज्ञापन ---------------
वडाध्यक्ष फूर्वा दोर्जे तामाङका अनुसार साना तथा लघु उद्यमीले उत्पादन गरेका वस्तुको प्रवर्द्धन र बजारीकरणमा सहयोग गर्ने उद्देश्यले मेला आयोजना गरिएको हो। मेलामा १ सय निःशुल्क स्टल रहनेछन् र सहभागी व्यवसायीका लागि यातायातको व्यवस्था गरिनेछ।
नृत्य प्रतियोगितामा पहिलो, दोस्रो र तेस्रोलाई क्रमशः ५० हजार, ३५ हजार र २० हजार रुपैयाँसहित सम्मान गरिनेछ भने सान्त्वना पुरस्कार पनि प्रदान गरिनेछ। उत्कृष्ट विद्यार्थी, राष्ट्रिय खेलाडी, अटोमेकानिक मिस्त्री तथा उद्यमीहरूलाई समेत सम्मान गरिने आयोजकले जनाएको छ।
करिब ८ लाख रुपैयाँ लागत अनुमान गरिएको मेलाका लागि मूल समिति र ६ उपसमिति गठन गरिएको छ।
