मकवानपुर- बागमती प्रदेश खेलकुद विकास परिषद्को आयोजनामा सञ्चालन भएको प्रथम अन्तर प्रदेश राष्ट्रिय खेलकुद प्रतियोगितामा १४० पदकसहित बागमती प्रदेश प्रथम भएको छ ।
-------------- बिज्ञापन ---------------
बागमती प्रथम हुँदा सुदूरपश्चिम दोस्रो, कोशी तेस्रो, गण्डकी चौथो, लुम्विनी पाँचौ, कर्णाली छैठौं र मधेश प्रदेश सान्त्वना भयो । बागमतीले ६१ स्वर्ण, ४३ रजत र ३६ कास्य गरी १४० पदक जित्दै प्रथम स्थान हाँसिल गरेको हो । बागमतीले महिला भलिबल र ब्याड्मिन्टनमा एक÷एक वटा स्वर्ण जित्दा बक्सिङ र करातेमा ९÷९, तेक्वान्दो र एथ्लेटिक्समा ७÷७ र पौडीमा २७ स्वर्ण पदक जितेको हो ।
सुदूरपश्चिम २१ स्वर्ण, २१ रजत र २९ कास्य गरी कुल ७१ पदकसहित दोस्रो स्थानमा रहँदा तेस्रो स्थानमा रहेको कोशी प्रदेशले १६ स्वर्ण, २३ रजत र ३६ कास्य गरी ७४ पदक रहेको छ । गण्डकी प्रदेशले ११ स्वर्ण, १८ रजत र २० कास्य गरी जम्मा ४९ पदक जितेको छ । लुम्बिनीले ११ स्वर्ण, १६ रजत र २८ कास्य गरी ५५ पदक जितेको छ भने कर्णाली प्रदेशले ११ स्वर्ण, १० रजत र २४ कास्य गरी ४५ पदक जितेको छ । अंक तालिकाको पुछारमा रहेको मधेश प्रदेशले हालसम्म ३ स्वर्ण, ३ रजत र १५ कास्य गरी २१ पदक जितेको छ ।
चैत्र २५ गतेबाट सञ्चालन भएको प्रतियोगितामा पुरुष फुटबल बाहेकको सबै खेल छिमेकी जिल्ला चितवनको भरतपुरमा सञ्चालन भएको थियो । प्रतियोगितामा विभिन्न खेलको लागि ७ वटा प्रदेशका १ हजार ७८५ जना खेलाडी, प्रशिक्षक, प्राविधिक टिम, निर्णायक र खेलाडी गरी २ हजार ७३० जनाले प्रतियोगितामा सहभागिता जनाएका थिए ।
प्रतियोगितामा फुटबल, भलिबल, क्रिकेट, बक्सिङ, कराते, तेक्वान्दो, एथ्लेटिक्स, पौडी र ब्याड्मिन्टन गरी ९ विधामा प्रतिस्पर्धा भएको थियो ।
