मकवानपुर – यही २८ गतेबाट हेटौंडामा बागमती प्रदेशस्तरीय युवा सम्मेलनको आयोजना हुँदैछ । बागमती प्रदेशको सामाजिक विकास मन्त्रालय अन्तर्गत प्रदेश युवा परिषद्ले युवालाई सामाजिक र सार्वजनिक जीवनमा सहभागी गराउने, नवप्रवर्तन र उद्यमशीलता विकास गर्ने उद्देश्यले आयोजना गर्न लागेको हो ।
-------------- बिज्ञापन ---------------
युवा सम्मेलनको तयारी करिब पूरा भएको प्रदेश युवा परिषद्का कार्यकारी उपाध्यक्ष सन्तोष चौलागाईंले जानकारी दिए । १३ जिल्लाका युवाको सहभागितामा हुन लागेको सम्मेलनमा २ सय भन्दा बढी १६ वर्षदेखि ३० वर्ष उमेर समूहका युवाको सहभागिता रहनेछ ।
सम्मेलनमा सहभागी युवालाई नै लक्षित गरी अन्तरक्रिया, वहस, कार्यशाला, सहभागीबीच आपसी सञ्जाल निर्माण, प्रेरक सन्दर्भको व्याख्या र नेतृत्व तथा व्यक्तित्व विकाससँग सम्बन्धित क्रियाकलापको आयोजना हुनेछ ।
‘युवालाई सामाजिक र सार्वजनिक जीवनमा सहभागी गराउनुका साथै नवप्रवर्तन र उद्यमशीलतासँग जोड्ने नै सम्मेलनको मुख्य उद्देश्य हो’, कार्यकारी उपाध्यक्ष चौलागाईंले भने, ‘गत वर्ष सम्पन्न प्रथम सम्मेलन ऐतिहासिक र सफल रह्यो भन्ने हाम्रो बुझाई हो ।
यस वर्ष सम्मेलनमा सहभागी हुन चाहने ५३७ जनाले अनलाइनमार्फत आवेदन दिएका थिए । आवेदन दिएका मध्ये २०० जनालाई पूर्ण समावेशी अवधारणामा छनोट गरिएको छ । सम्मेलनमा सहभागी हुने २०० जना बागमती प्रदेशको ११९ पालिकामध्ये ८९ पालिकाका युवा छानिएका छन् ।
युवा सम्मेलन क्षमता विकास तथा उद्यमशीलता र रोजगारीसँगै सीप विकासमा उपयोगी हुने आयोजकको विश्वास छ । ‘युवा पुस्तामा चरम निराशाकाबीच आशा जगाउन युवा सम्मेलनले टेवा पु¥याउने छ भन्ने लागेको छ’, चौलागाईंले भने ।
सम्मेलनमा सहभागीको आवास र खानाका लागि २० लाख रुपैयाँ खर्च हुने आयोजकको अनुमान छ । सम्मेलनमा अन्य सम्पूर्ण काम स्वयम्सेवक मार्फत गरिने छ । युवा सम्मेलनको अन्तिम दिन ३० गते मुख्यमन्त्रीसँग युवा कार्यक्रम गरी समापन गरिनेछ ।
