प्रधानमन्त्री पुष्पकमल दाहाल प्रचण्डले चौथो पटक विश्वासको मत पाएका छन् । जेठ ७ गते सोमबारको संसद बैठकमा सभामुख देवराज घिमिरेले प्रधानमन्त्रीले प्रतिनिधिसभाबाट विश्वासको मत पाएको घोषणा गरे । नेपाली कांग्रेसका सांसदहरूको नाराबाजीको बीच सोमबार भएको मतदानबाट प्रधानमन्त्रीले विश्वासको मत पाएका हुन् ।
-------------- बिज्ञापन ---------------
प्रधानमन्त्रीले संविधानको धारा १०० को उपधारा २ बमोजिम प्रतिनिधिसभा नियमावली २०७९ नियम १५५ को उपनियम ४ बमोजिम सोमबारको दोस्रो बैठकमा विश्वासको मतसम्बन्धी प्रस्ताव पेस गरेका थिए । जसअनुसार सभामुखले मत विभाजन गर्दा दुई सय ७५ सदस्यीय प्रतिनिधिसभामा कुल १५८ सांसदले भाग लिएका थिए । तीमध्ये १५७ जनाले प्रधानमन्त्रीलाई विश्वासको मत दिएको पाइएको छ भने विपक्षमा ० र तटस्थमा १ मत परेको छ ।
नेकपा एमाले, नेकपा (माओवादी केन्द्र), राष्ट्रिय स्वतन्त्र पार्टी, नेकपा (एकीकृत समाजवादी), नागरिक उन्मुक्ति पार्टी, अशोक राई नेतृत्वको जनता समाजवादी पार्टी, जनमत पार्टी र तीन जना स्वतन्त्र सांसदले प्रधानमन्त्रीलाई विश्वासको मत दिएका छन् । नेपाली कांग्रेस, राष्ट्रिय प्रजातन्त्र पार्टी र जनता समाजवादी पार्टी नेपाल, लोकतान्त्रिक समाजवादी पार्टीलगायतका दलले मतदानमा नै भाग लिएनन् ।
सरकारमा सहभागी दल जसपा नेपाल विभाजन भई सो पार्टीले समर्थन फिर्ता लिएपछि प्रधानमन्त्री प्रचण्डले फेरि विश्वासको मत लिनु परेको हो । अवरोधका बीच विश्वासको मत पाएपछि प्रचण्ड प्रफुल्ल देखिए। उनले अन्तिमसम्म बसेर सबै सांसदको बधाई ग्रहण गरे । उपप्रधान एवं गृहमन्त्री रवि लामिछानेविरुद्ध सहकारी ठगी प्रकरणमा संसदीय छानबिन समिति माग गर्दै कांग्रेसले निरन्तर संसद् अवरोध गर्दै आएको छ।
