हेटौंडा उपमहानगरपालिका पूर्ण खोप सुनिश्चितता भएको पालिका घोषणा गरिएको छ । उमहानगरपालिका कार्यालयमा आइतवार आयोजित एक कार्यक्रममा हेटौंडालाई पूर्ण खोप सुनिश्चितता भएको घोषणा गरिएको हो । उपमहानगरभित्र रहेका ५ वर्ष मुनिका ७ हजार १८५ जना बालबालिकालाई पूर्ण खोप लगाइएको उपमहानगरपालिका स्वास्थ्य शाखा प्रमुख सूर्यप्रसाद तिवारीले जानकारी दिए ।

-------------- बिज्ञापन ---------------

उपमहानगरपालिकाभित्र रहेका ५ वर्ष मुनिका सम्पूर्ण बालबालिकालाई खोप दिएसँगै उपमहानगरलाई पूर्ण खोप सुनिश्चितता भएको प्रमाणपत्र हस्तान्तरण गरिएको छ । जिल्ला खोप समन्वय समिति मकवानपुरका सचिव समेत रहेका स्वास्थ्य कार्यालयका प्रमुख कृष्णबहादुर मिजारले मेयर मीनाकुमारी लामालाई प्रमाणपत्र हस्तान्तरण गरेका हुन् ।

उपमहानगरको स्वास्थ्य शाखाका अनुसार नगर क्षेत्रमा खोप लगाउन तयार भएका १५ महिना मुनिका ३ हजार ९४१ जना बालबालिकाको तथ्याङक पनि तयार गरेर राखिएको छ । उनीहरुलाई समय पुगेसँगै खोप अभियानमा समावेश गरिने शाखाले जनाएको छ । गत चैत महिनादेखि उपमहानगरपालिकालाई पूर्ण खोप घोषणा गर्ने अभियान सञ्चालन गरिएको थियो ।

स्वास्थ्यकर्मी, महिला स्वयम्सेविका र जनप्रतिनिधी घरघरमा पुगेर बालबालिकालाई खोप लगाउने कार्य गरेको उपमहानगरका स्वास्थ्य शाखा प्रमुख तिवारीले बताए । पूर्ण खोप सुनिश्चितता तथा दिगोपना घोषणा कार्यक्रममा मेयर लामाले पूर्ण खोपलाई दिगोपन दिनका लागि स्वास्थ्यकर्मी, महिला स्वयसेविका र जनप्रतिनिधी सधै सक्रिय भएर लाग्ने बताइन् । उपमहानगरपालिकालाई बालमैत्री घोषणा गर्नका लागि पूर्ण खोप महत्वपूर्ण सुचक रहेको उनको भनाई थियो ।

कार्यक्रममा उपमेयर राजेश बानियाँ, स्वास्थ्य निर्देशनालयका महाशाखा प्रमुख सागर घिमिरेले खोपका बारेमा धारणा राखेका थिए । घोषणा कार्यक्रममा १९ वटै वडाका वडा अध्यक्ष र स्वास्थ्यकर्मीहरुलाई खादा ओढाएर सम्मानसहित कदरपत्र समेत प्रदान गरिएको थियो ।