हेटौँडा – मकवानपुर प्रहरीले ८० किलो अवैध लागूऔषध गाँजासहित २ जनालाई पक्रेको छ । जिल्लाको थाहा नगरपालिकास्थित डाँडाबासबाट काठमाडौतर्फ जाँदै गरेको बा.५ च ४४११ नम्बरको टाटासुमो चेकिङको क्रममा गाँजासहित २ जनालाई पक्राउ गरेको हो ।

-------------- बिज्ञापन ---------------

पक्राउ पर्नेमा सुमोका चालक गोरखाको पालुङटार नगरपालिका १० मिरकोट घर भई हाल: काठमाडौ १३ कालिमाटी डेरा गरी बस्दै आएका २८ वर्षका मधुसुदन अधिकारी र सुमोमा रहेला सिन्धुलीको दुधौली नगरपालिका ८ खोरभञ्ज्याङ घर भई काठमाण्डौको डल्लुमा डेरा गरी बस्ने २५ वर्षका नवराज खड्का रहेका छन् ।

सुमोभित्र लुकाएर ल्याएको अवस्थाको ८० किलो १२० ग्राम गाँजा फेला पारिएको जिल्ला प्रहरी कार्यालय मकवानपुरका प्रवक्ता प्रहरी नायव उपरीक्षक श्यामु अर्यालले बताए ।

थाहा नगरपालिका ३ थानाबजारस्थित त्रिभुवन राजपथ सडक खण्डमा लागूऔषध ओसारपसार भइरहेको छ भन्ने सूचनाको आधारमा ईलाका प्रहरी कार्यालय पालुङबाट खटिएको प्रहरी टोलीले उनीहरुलाई पक्रेको हो ।

गाँजासहित पक्राउ परेका अधिकारी र खड्का दुवैलाई जिल्ला अदालत मकवानपुरबाट १० दिनको म्याद अनुमति लिएर थप अनुसन्धान कार्य अघि बढाइएको प्रवक्ता अर्यालले बताए ।