जारी चैनपुर जेसीज मनहरीको जेसीज सप्ताह अन्तर्गत भएको बिस्तारै मोटरसाइकल चलाउने प्रतिस्पर्धामा निमेष केसी प्रथम भएका छन् । अन्य १५ प्रतिस्पर्धीलाई अघि लगाउँदै उनले बिस्तारै मोटरसाइकल चलाएका हुन् ।
-------------- बिज्ञापन ---------------
प्रतिस्पर्धामा सहभागी १६ जनालाई ४ समूहमा विभाजन गरी प्रतिस्पर्धा गराइएको थियो । प्रत्येक समूहको विजेता ४ जना फाइनल स्पर्धामा उत्रेका थिए । फाइनलमा निमेषसहित मणिराज केसी, राम गौतम र लक्ष्मण गौतमले प्रतिस्पर्धा गरेका थिए ।
प्रतियोगिताको विजेता केसीले नगद ५ हजार रुपैयाँ प्राप्त गरेका छन् । उनलाई जेसीज सप्ताहको समापनको दिन कात्तिक १ गते पुरस्कार वितरण गरिने जेसीज सप्ताह मूल कार्यक्रम संयोजक मिलन ढुंगानाले जानकारी दिए ।
कार्यक्रम संयोजक राजकुमार तिमल्सिनाको संयोजकत्व एवम् जेसीजका अध्यक्ष कृष्णप्रसाद ढकालको अध्यक्षतामा भएको कार्यक्रममा मनहरी गाउँपालिका ४ नम्बर वडा अध्यक्ष प्रकाश थापाको प्रमुख आतिथ्यता रहेको थियो ।
वडा अध्यक्ष थापाले पछिल्लो समय तीव्र गतिका कारण दुर्घटना बढ्दो क्रममा रहेको स्मरण गराउँदै विस्तारै चलाएर पनि पुरस्कार जित्न सकिने धारणा राखे । ‘दुर्घटनाको प्रमुख कारणहरु मध्ये तीव्र गति पनि एक हो’, उनले भने, ‘बिस्तारै सवारी चलाएर पनि गन्तव्यमा पुग्न सकिन्छ ।
यो शिक्षा विशेषगरी युवाहरुले सिक्न जरुरी छ ।’ कार्यक्रममा स्थानीय विभिन्न संघसंस्थाका प्रमुख प्रतिनिधिको आतिथ्यता रहेको थियो ।
