मकवानपुरको मनहरीमा साथीले बोकेको भरुवा बन्दुक पड्किँदा आइतबार राति एक जनाको मृत्यु भएको छ ।
मनहरी गाउँपालिका–६ वालभञ्ज्याङका ५० वर्षीय सेते थिङको साथीले बोकेको भरुवा बन्दुक पड्किँदा गोली लागेर घटनास्थलमै मृत्यु भएको हो । यहाँको सिस्नेरीपखेरा जंगलमा राक्सिराङ गाउँपालिका–८ राजराङका ४५ वर्षीय गोपाल ब्लोन भरुवा बन्दुक बोकेर अगाडि–अगाडि हिँडिरहेका थिए भने सेते पछाडि–पछाडि हिँडिरहेका थिए । उनीहरू शिकार खेल्न गएका थिए । अगाडि हिँडिरहेका गोपाल लहरमा अल्झिएर लड्दा बन्दुक पड्किँदा पछाडि हिँडिरहेका सेतेलाई लागेको थियो । उनको घटनास्थलमै मृत्यु भएको जिल्ला प्रहरी कार्यालय मकवानपुरका सूचना अधिकारी राजुप्रसाद कुर्मीले बताए । प्रहरीले दुई थान भरुवा बन्दुकसहित गोपाल ब्लोनलाई नियन्त्रणमा लिएर कानुनी कारबाही अघि बढाएको जनाएको छ ।

-------------- बिज्ञापन ---------------