गत वर्ष नेपाली सिनेमा उद्योगलाई ब्लकबस्टर फिल्म ‘बोक्सीको घर’ दिएको टिम पुनः नयाँ चलचित्र निर्माणमा जुटेको छ । अभिनेत्री तथा निर्माता केकी अधिकारी र निर्देशक सुलक्षण भारतीले नयाँ सामाजिक ड्रामा चलचित्र ‘पेट्रोल पम्प’ निर्माणको औपचारिक घोषणा गरेका हुन् ।
-------------- बिज्ञापन ---------------
‘बोक्सीको घर’ रिलिजका क्रममा पुनः सहकार्य गर्ने प्रतिबद्धता जनाएका केकी र सुलक्षणको सहकार्य अब ‘पेट्रोल पम्प’मार्फत अघि बढ्ने भएको हो । चलचित्रको निर्देशन तथा कथा सुलक्षण भारतीले गर्नेछन् भने निर्माण केकी अधिकारीले गर्नेछिन् । यसअघि ‘बोक्सीको घर’मा पनि सुलक्षण लेखक–निर्देशक र केकी निर्माता तथा मुख्य अभिनेत्रीको भूमिकामा थिइन् ।
निर्माणपक्षका अनुसार सामाजिक विषयवस्तुमा आधारित चलचित्र ‘पेट्रोल पम्प’ विसं २०८३ मा प्रदर्शनमा ल्याइनेछ । कलाकार तथा प्राविधिक टिमको विवरण भने केही समयपछि सार्वजनिक गरिने जनाइएको छ ।
उल्लेखनीय छ, बद्री अधिकारी निर्माता रहेको ‘बोक्सीको घर’ले नेपाली बक्सअफिसमा ११ करोडभन्दा बढी ग्रस कलेक्सन गर्दै ठूलो सफलता हासिल गरेको थियो । केकी अधिकारीको पहिलो निर्माण नै ब्लकबस्टर बन्न सफल भएको उक्त चलचित्रको ‘बुझिन मैले’ गीत दर्शकमाझ निकै चर्चित बनेको थियो ।
