मकवानपुरगढी गाउँपालिका–२ ताल्चेमा अर्गानिक टनेल खेतीसम्बन्धी कृषक पाठशाला तालिम सुरु गरिएको छ ।
-------------- बिज्ञापन ---------------
सामुदायिक महिला विकास केन्द्र मकवानपुरको आयोजना तथा सामाजिक विकास मन्त्रालय बागमती प्रदेशको आर्थिक सहयोगमा सञ्चालन गरिएको तालिमको उद्घाटन गरिएको हो ।
उद्घाटन कार्यक्रममा प्रमुख अतिथिका रूपमा मकवानपुरगढी गाउँपालिका–२ का वडा अध्यक्ष बखानसिं पाख्रिन सहभागी रहेका थिए । कार्यक्रममा बोल्दै उनले आधुनिक तथा अर्गानिक कृषि प्रणालीले किसानको उत्पादन वृद्धि र आयआर्जनमा टेवा पुग्ने विश्वास व्यक्त गरे ।
बैशाख २८ गतेदेखि सुरु भएको तालिम जेठ ११ गतेसम्म सञ्चालन हुने आयोजकले जनाएको छ । तालिममार्फत कृषकलाई अर्गानिक टनेल खेती, उत्पादन व्यवस्थापन तथा व्यावसायिक कृषि सम्बन्धी व्यवहारिक ज्ञान प्रदान गरिने बताइएको छ ।
संस्थाका अध्यक्ष मिलन बजगाईंको सभाध्यक्षतामा सम्पन्न उद्घाटन कार्यक्रममा वडा सदस्य लक्ष्मी विक, टोल विकास संस्थाका अध्यक्ष गुणराज तिमल्सिनालगायत स्थानीय कृषक तथा सरोकारवालाको उपस्थिति रहेको थियो ।
