मकवानपुरमा आगामी फागुन २१ गते हुने प्रतिनिधिसभा सदस्य निर्वाचनका लागि उम्मेदवारी दर्ता सम्पन्न भएसँगै चुनावी रौनक सुरु भएको छ । दलहरू तोकिएको समयअनुसार दलबलसहित हेटौंडास्थित निर्वाचन अधिकृतको कार्यालय पुगेर मनोनयन दर्ता गराएका हुन् ।
-------------- बिज्ञापन ---------------
मकवानपुर निर्वाचन क्षेत्र–१ मा २३ जना उम्मेदवार चुनावी मैदानमा उत्रिएका छन् । जसमा १३ जना दलीय र १० जना स्वतन्त्र उम्मेदवार रहेका छन् । यस्तै, निर्वाचन क्षेत्र–२ मा १६ दलीय र ५ स्वतन्त्र गरी कुल २१ जना उम्मेदवार प्रतिस्पर्धामा छन् । दुवै क्षेत्रमा गरी कुल ४४ जनाको उम्मेदवारी दर्ता भएको छ ।
नेपाली कांग्रेसबाट मकवानपुर क्षेत्र–१ मा पूर्व सहमहामन्त्री महालक्ष्मी उपाध्याय ‘डीना’ ले उम्मेदवारी दर्ता गराउनुभएको छ । उपाध्यायको उम्मेदवारी दर्ताका क्रममा दामोदर खनाल प्रस्तावक र इन्द्रबहादुर बानियाँ समर्थक रहेका छन् भने क्षेत्र नम्बर–२ मा कांग्रेस मकवानपुर जिल्ला सभापति बुद्ध लामाले उम्मेदवारी दर्ता गराएका छन् । लामाको प्रस्तावकमा ईश्वर पाठक र समर्थकमा रञ्जन कालाखेती रहेका छन् । मंगलबार दुवैले निर्वाचन अधिकृतको कार्यालय पुगेर मनोनयनपत्र बुझाएका हुन् ।
२०७९ सालको प्रतिनिधिसभा निर्वाचनमा मकवानपुर क्षेत्र–१ बाट राष्ट्रिय प्रजातन्त्र पार्टी (राप्रपा) का दीपकबहादुर सिंह २ हजार ३ सय ९३ मत अन्तरसहित निर्वाचित भएका थिए । उनले २७ हजार ८ सय १४ मत प्राप्त गर्दा उनका निकटतम प्रतिस्पर्धी लोकतान्त्रिक बाम गठबन्धनतर्फबाट उम्मेदवार रहेकी कांग्रेस नेतृ डीनाले २५ हजार ४ सय ३४ मत प्राप्त गरेकी थिइन् । पार्टी संगठन सुदृढीकरण, महिला अधिकार र समावेशी लोकतन्त्रका मुद्दामा सक्रिय रहँदै आएकी डीनालाई कांग्रेसले पुनः उम्मेदवार बनाएको हो ।
त्यस निर्वाचनमा राप्रपा नेपालका अध्यक्ष कमल थापा २५ हजार ४ सय २० मतसहित तेस्रो भएका थिए । यसपटक भने थापा गृहजिल्ला मकवानपुर छाडेर काठमाडौं–५ बाट उम्मेदवार बनेका छन् । ३५ वर्षयता पहिलोपटक थापा मकवानपुरबाट चुनावी मैदानमा देखिने छैनन् ।
केन्द्रमा सत्तासमीकरण फेरिएसँगै राप्रपाले सरकारलाई दिएको समर्थन फिर्ता लिँदा सांसद सिंह सरकारबाट बाहिरिएका थिए । उनी माओवादी केन्द्र नेतृत्वको संघीय सरकारमा ऊर्जा, जलस्रोत तथा सिँचाइ राज्यमन्त्री बनेका थिए । २०७९ को स्थानीय तह निर्वाचनमा हेटौंडा उपमहानगरपालिकाको मेयरमा झिनो मतले पराजित भएपछि सिंहको राजनीतिक चर्चा थप चुलिएको थियो ।
नेकपा एमालेबाट मकवानपुर क्षेत्र–१ मा रामेश्वर रानाले उम्मेदवारी दर्ता गराएका छन् । उनका प्रस्तावक गोपालप्रसाद दाहाल र समर्थक इन्द्रमान स्यांतान रहेका छन् । क्षेत्र–२ मा एमालेबाट पूर्व सांसद महेश बर्तौलाले उम्मेदवारी दिएका छन् । उनका प्रस्तावक राजाराम स्यांतान र समर्थक सुवासचन्द्र ठकुरी छन् ।
नेकपा (नेकपा) बाट क्षेत्र–१ मा विजय गौतम र क्षेत्र–२ मा लवशेर बिष्टले उम्मेदवारी दर्ता गरेका छन् । पहिलोपटक संसदीय निर्वाचनमा प्रतिस्पर्धा गर्न लागेका गौतम विद्यार्थी राजनीतिबाट उदाएका नेता हुन् । मकवानपुर–२ का उम्मेदवार बिष्ट रुपचन्द्र बिष्ट ‘रुदाने’ का अनुयायीका रूपमा चिनिन्छन् । उनी २०७४ सालमा थाहा नगरपालिका मेयर निर्वाचित भएका थिए ।
राष्ट्रिय स्वतन्त्र पार्टी (रास्वपा) बाट क्षेत्र–१ मा प्रकाश गौतम र क्षेत्र–२ मा प्रशान्त उप्रेतीले उम्मेदवारी दर्ता गराएका छन् । प्रगतिशील लोकतान्त्रिक पार्टी (प्रलोपा) बाट क्षेत्र–१ मा तेजप्रसाद उप्रेती र क्षेत्र–२ मा सन्तोष बिष्ट उम्मेदवार बनेका छन् ।
यस्तै, श्रम संस्कृति पार्टीबाट क्षेत्र–१ मा विद्या श्रेष्ठ र क्षेत्र–२ मा युनिश लामाले उम्मेदवारी दर्ता गराएका छन् । श्रेष्ठ हेटौंडा बजार क्षेत्रको सडक विस्तारविरुद्ध आवाज उठाउँदै आएकी अभियन्ता हुन् ।
