आसन्न प्रतिनिधि सभा सदस्य निर्वाचनलाई स्वच्छ, स्वतन्त्र, निष्पक्ष र भयरहित वातावरणमा सम्पन्न गराउन आजदेखि नेपाली सेनाको संयोजनमा चारवटै सुरक्षा निकाय परिचालित हुने भएका छन् ।
-------------- बिज्ञापन ---------------
सरकारले स्वीकृत गरेको प्रतिनिधि सभा सदस्य निर्वाचन एकीकृत सुरक्षा योजना–२०८२ अनुसार नेपाली सेना, नेपाल प्रहरी, सशस्त्र प्रहरी बल नेपाल र राष्ट्रिय अनुसन्धान विभाग एकीकृत रूपमा परिचालन हुन लागेका हुन् ।
आगामी फागुन २१ गते हुने निर्वाचनलाई लक्षित गर्दै निर्वाचनको एक महिना अघिदेखि सुरक्षा व्यवस्था थप कडा बनाइएको छ ।
एकीकृत सुरक्षा योजनाअनुसार मतदान स्थलको भित्री घेरा नेपाल प्रहरी र निर्वाचन प्रहरीले सम्हाल्नेछन् । दोस्रो घेरा सशस्त्र प्रहरी बल नेपालले लिनेछ भने तेस्रो तथा बाहिरी घेरा नेपाली सेनाले सम्हाल्नेछ । नेपाली सेना १६५ वटै निर्वाचन क्षेत्रमा आजदेखि परिचालित हुने सेनाले जनाएको छ ।
निर्वाचन सुरक्षाका लागि राष्ट्रपति रामचन्द्र पौडेलले प्रधानमन्त्रीको सिफारिस तथा मन्त्रिपरिषद्को निर्णयअनुसार गत मङ्सिर ११ गते नेपाली सेना परिचालन गर्न स्वीकृति दिएका थिए । सेनाका प्रवक्ता एवं सहायक रथी राजाराम बस्नेतका अनुसार आवश्यकताअनुसार सेनाको ‘वेस’ खडा गरिने र संयुक्त गस्तीसमेत सञ्चालन गरिनेछ ।
सेनाले निर्वाचनका लागि करिब ८० हजार जनशक्ति परिचालन गर्ने तयारी गरेको छ । निर्वाचनपूर्व मतपत्र छपाइ र ढुवानी, मतदान स्थल तथा मतगणनास्थलको सुरक्षा, मतपेटिका ढुवानीलगायत जिम्मेवारी सेनाले सम्हाल्नेछ । साथै विमानस्थल, कारागारलगायत संवेदनशील संरचनाको सुरक्षा पनि नेपाली सेनाले गर्नेछ ।
यसपटकको निर्वाचनमा ३ हजार ४०६ उम्मेदवार चुनावी प्रतिस्पर्धामा छन् । निर्वाचन आयोगले माघ ४ गतेदेखि निर्वाचन आचारसंहिता लागू गरिसकेको छ । देशभर १ करोड ८९ लाख ३ हजार ६८९ मतदाता कायम छन् ।
निर्वाचनका लागि १० हजार ९६७ मतदान स्थल मा २३ हजार ११२ मतदान केन्द्र तोकिएको छ । नेपाल प्रहरीतर्फबाट ७७ हजार जनशक्ति परिचालित हुनेछन् भने थप १ लाख ३३ हजार निर्वाचन प्रहरी भर्ना गरिएको छ ।
मतदान स्थललाई जोखिमका आधारमा वर्गीकरण गरिएको छ । २ हजार ८४५ मतदान स्थल सामान्य, ४ हजार ४४२ संवेदनशील र ३ हजार ६८० अति संवेदनशील मानिएका छन् । सोहीअनुसार सुरक्षा व्यवस्था मिलाइएको प्रहरीले जनाएको छ ।
सशस्त्र प्रहरी बल नेपालबाट ३४ हजार ५७६ जनशक्ति र १५ हजार ११० निर्वाचन प्रहरी गरी कुल ४९ हजार ६८६ जना परिचालन हुनेछन् । सशस्त्र प्रहरीले कुनै पनि अप्रिय घटना भएमा १० मिनेटभित्र घटनास्थलमा पुग्ने गरी उच्च सतर्कता अपनाइएको जनाएको छ ।
