पाठेघरको मुखको क्यान्सरबाट किशोरीहरूलाई जोगाउने उद्देश्यसहित राष्ट्रिय खोप कार्यक्रम अन्तर्गत मकवानपुरगढी गाउँपालिकामा १९३ जना छात्रालाई एचपिभी खोप लगाइने भएको छ ।
-------------- बिज्ञापन ---------------
गाउँपालिका स्तरीय खोप समन्वय समितिले आज अभिमुखीकरण कार्यक्रम आयोजना गर्दै माघ २६ देखि २८ गतेसम्म खोप सेवा सञ्चालन गरिने जानकारी दिएको हो । अभियान अन्तर्गत पालिकाभित्रका १६ वटा सामुदायिक विद्यालय र १ वटा संस्थागत विद्यालयका कक्षा ६ मा अध्ययनरत छात्रालाई खोप लगाइनेछ ।
समन्वय समितिका संयोजक तथा गाउँपालिका अध्यक्ष दोर्जे लामा स्याङ्तानको अध्यक्षतामा सम्पन्न अभिमुखीकरण कार्यक्रममा अध्यक्ष स्याङ्तानले रोग लागेपछि उपचारभन्दा रोग लाग्न नदिन खोप नै प्रभावकारी माध्यम भएको बताए । क्यान्सरजस्तो जटिल रोगको रोकथामका लागि विद्यालयमै सहज वातावरण सिर्जना गरी खोप सञ्चालन गर्न आग्रह गरे।
स्वास्थ्य शाखा प्रमुख ध्रुवप्रसाद लामिछानेका अनुसार यसवर्ष पालिकाभित्र कुल १९३ जनामा खोप लगाइनेछ । जसमध्ये गतवर्ष छुटेका ९ जना र विद्यालय बाहिर रहेका २ जना किशोरीलाई खोप प्रदान गरिने लामिछानेले जानकारी दिए ।
अभियानका क्रममा छुटेका छात्रालाई फागुन ८ देखि १० गतेसम्म सञ्चालन हुने नियमित खोप कार्यक्रममा खोप लगाइनेछ । गतवर्ष गाउँपालिकाभित्र कक्षा ६ देखि १० सम्मका २ हजार ४५ जना किशोरीलाई एचपिभी खोप लगाइएको थियो
अभिमुखीकरण कार्यक्रममा प्रमुख प्रशासकीय अधिकृत ई. सुधन लामिछाने, वडा नं. २ का अध्यक्ष बखान सिंह पाख्रिन, वडा नं. ४ का अध्यक्ष अर्जुनप्रसाद तिमल्सिना, वडा नं. ७ का अध्यक्ष सूर्यबहादुर रुम्बा, वडा नं. ६ का कार्यवाहक अध्यक्ष जीतबहादुर घलान, सबै वडाका स्वास्थ्य चौकी इन्चार्जहरूको सहभागिता रहेको थियो ।
