वि.सं. २०२१ असोज २० गते जन्मिएकी महालक्ष्मी उपाध्याय डिना विद्यार्थी राजनीतिबाट उदाएकी नेता हुन् । राजनीतिक परिवारमा हुर्किएकी उनको हजुरबुवा उदयनाथ अधिकारी प्रजातन्त्र सेनानी थिए जसले राजनीतिक सक्रियताका कारण १२ वर्ष जेल जीवन बिताएका थिए । राजनीतिमा सानैबाट उत्सुक उनी २०३९ सालमा कन्या माध्यमिक विद्यालय (लैनचौर) बाट एसएलसी उत्तीर्ण गरेपछि औपचारिक रुपमा विद्यार्थी राजनीतिमा लागेकी हुन् ।
-------------- बिज्ञापन ---------------
२०३९ सालमा पद्मकन्या क्याम्पसको नेवि संघ इकाइ सदस्य भएर राजनीतिमा प्रवेश गरेकी थिइन् । २०४२ सालको सत्याग्रहमा सहभागी हुँदा उनी पक्राउ परिन् र ७ महिना केन्द्रीय महिला कारागारमा बन्दी जीवन बिताइन् । जेलमा उनले नेतृ शैलजा आचार्यको निकट हुने मौका पाइन् । रिहा भएपछि उनी २०४३ मा पद्मकन्या क्याम्पसको स्ववियु सभापति पदमा निर्वाचित भएकी थिइन् ।
डनाले पद्मकन्या क्याम्पसबाट बी.ए. र त्रिभुवन विश्वविद्यालयबाट अर्थशास्त्रमा स्नातकोत्तर (एम.ए.) गरेकी छिन् । साथै, उनले बेलायतको रिडिङ विश्वविद्यालयबाट ‘ग्रामीण विस्तार र महिला’ विषयमा पोष्ट ग्राजुएट (पीजी) उपाधि हासिल गरेकी छिन् । राजनीतिलाई अघि बढाउने क्रममा २०४७ देखि ५७ सम्म नेपाल महिला संघ मकवानपुरको संस्थापक अध्यक्ष, २०६२ मा नेपाली कांग्रेसको केन्द्रीय सदस्य र २०७८ सालमा भएको कांग्रेसको १४ औं महाधिवेशनमा केन्द्रीय सहमहामन्त्री पदमा विजयी भएर काम गरिसकेकी छिन् ।
कांग्रेसको राजनीतिमा राम्रो पहुँचका साथै इमान्दार र विद्यार्थी राजनीतिबाट आएकी उपाध्यायले जलस्रोत राज्यमन्त्रीको भूमिका समेत निर्वाह गरिसकेकी छिन् । उनले दुईपटक संविधानसभा सदस्यको रूपमा संविधान लेखनमा सक्रिय भूमिका निर्वाह गरेकी थिइन् ।
नेपालको संविधान २०७२ मा महिला अधिकार, पैतृक सम्पत्तिमा समान अधिकार र राज्यका निकायमा ३३ प्रतिशत महिला सहभागिता सुनिश्चित गर्न उनले नेतृत्वदायी भूमिका खेलेकी थिइन् । २०६३ सालको अन्तरिम सरकारमा जलस्रोत राज्यमन्त्री हुँदा उनले मकवानपुरका विकट गाउँहरूमा विद्युतीकरण विस्तारमा प्राथमिकता दिएकी थिइन् ।
संविधानसभा सदस्य हुँदा उपाध्यायले संविधान मस्यौदा समितिको सदस्यको रूपमा ‘मौलिक अधिकार र निर्देशक सिद्धान्त’ लेखनमा योगदान पु¥याएकी थिइन् । राजनीतिसँगै सामाजिक कार्यमा समेत उत्तिकै योगदान दिने क्रममा उनले सामुदायिक महिला विकास केन्द्रको अध्यक्ष भएर महिलाको हक अधिकारलाई ग्रामीण क्षेत्रमा बुझाउने र उनीहरुको हकहितमा काम गरेकी छिन् । यो संस्था मकवानपुरको पहिलो गैर–सहकारी संस्थाको रुपमा समेत रहेको छ ।
यस्तै २०५५ सालमा दिव्यतारा बहुउद्देश्यीय सहकारी संस्था स्थापना गरी संस्थापक अध्यक्ष भएर काम समेत गरिसकेकी छिन् । संविधानमा महिलाका हक अधिकार लेख्न महत्वपूर्ण योगदान दिएकी डिना जनताबाटै अनुमोदित भएर संविधान कार्यान्वयन गर्ने र जिल्लाको समग्र विकासमा लाग्ने सोचसहित यही फागुन २१ गते हुने प्रतिनिधिसभा सदस्य निर्वाचनका लागि मकवानपुरको क्षेत्र नम्बर १ बाट चुनावी प्रतिस्पर्धामा रहेकी छिन् ।
उनले एक पटक जिताएर जिल्लाको विकास र समृद्धिको सपना साकार पार्ने अभियानमा साथ दिन जिल्लाबासीलाई अनुरोध समेत गर्दै आएकी छिन् ।
