प्रधानमन्त्री तथा मन्त्रिपरिषद्को कार्यालयले आगामी आर्थिक वर्षको नीति, कार्यक्रम तथा बजेट निर्माण प्रक्रियामा आम नागरिकको सहभागिता बढाउने उद्देश्यले ‘सुझाव संकलन पोर्टल’ सञ्चालनमा ल्याएको छ ।
-------------- बिज्ञापन ---------------
आगामी सोमबार सार्वजनिक हुने सरकारको नीति तथा कार्यक्रममा जनताका आवश्यकता, अपेक्षा र प्राथमिकतालाई समेट्दै शासन प्रणालीलाई थप पारदर्शी, उत्तरदायी तथा जनमुखी बनाउने लक्ष्यसहित उक्त डिजिटल प्लेटफर्म सुरु गरिएको हो ।
सरकारले सञ्चालनमा ल्याएको पोर्टलमार्फत देश तथा विदेशमा रहेका नेपाली नागरिक, विज्ञ, निजी क्षेत्र तथा नीति निर्माताले विकासका प्राथमिकता, बजेट विनियोजन र सार्वजनिक सेवासम्बन्धी आफ्ना सुझाव सिधै सरकारसमक्ष पेश गर्न सक्ने व्यवस्था गरिएको छ ।
प्रधानमन्त्रीको सचिवालयका अनुसार नीति निर्माण प्रक्रियालाई सीमित प्रशासनिक घेराभित्र मात्र नराखी आम नागरिकको भावना र सहभागितासँग जोड्ने उद्देश्यले यो पहल गरिएको हो । यसबाट नागरिक र राज्यबीचको दूरी घट्नुका साथै लोकतान्त्रिक सहभागिता थप सुदृढ हुने विश्वास सरकारको रहेको छ ।
पोर्टलमा नागरिकले दिएको सुझावको अवस्थाबारे जानकारी लिन ‘सुझाव ट्र्याक’ गर्ने सुविधा समेत उपलब्ध गराइएको छ । प्राप्त सुझावहरूलाई सम्बन्धित निकायमार्फत गम्भीरतापूर्वक अध्ययन, विश्लेषण र समीक्षा गरी आवश्यक सुझावलाई नीतिगत तथा कार्यक्रमगत रूपमा समावेश गरिने प्रधानमन्त्रीको सचिवालयले जनाएको छ ।
