हेटौडा उपमहानगरपालिका वडा नम्बर ३ लाई निकृष्ट बालश्रम मुक्त तथा बालमैत्री स्थानीय शासनयुक्त वडा घोषणा गरिने भएको छ। बालबालिकामा लगानी सुनिश्चित भविष्यको थालनी भन्ने मूल नाराका साथ यही माघ १३ गते आइतबार घोषणा गरिने पत्रकार सम्मेलन गरेर जानकारी दिइएको हो।
-------------- बिज्ञापन ---------------
निकृष्ट बालश्रम मुक्त, बालविवाह मुक्त , बालमैत्री स्थानीय शासनयुक्त वडा घोषणा नगर प्रमुख मिनाकुमारी लामाज्यूको प्रमुख आतिथ्यतामा महेन्द्र किरण माध्यमिक विद्यालयको प्राङ्गणमा हुने वडा अध्यक्ष ढलक बहादुर थापाले जानकारी दिनुभयो ।
बहुभाषिक र बहुधार्मिक मिश्रित जनसमुदायको बसोबास रहेको यस वडामा कुल जनसङ्ख्या ६४४३ रहेको छ । बालबालिकाको सङ्ख्या १४९८ रहेको छ भने बालक ७९३ र बालिका ७०५ जना रहेको अध्यक्ष थापाले बताउनु भयो । यस वडामा सामुदायिक र संस्थागत बाल विकास केन्द्रसहित पाँचवटा विद्यालयहरू सञ्चालनमा छन् । १२ वटा बाल समूहहरू र एकवटा बाल सञ्जाल रहेको छ। जसमा ३०० जना बालबालिकाहरू आबद्ध रहेका छन्।
यस वडामा बालमैत्री स्थानीय शासन वडा समिति, वडा बाल अधिकार समिति, बाल समूहहरू, र १५ वटा टोल विकास संस्थाहरू क्रियाशील छन् । यस वडालाई पूर्णखोप वडा घोषणा, पूर्व साक्षर वडा घोषणा र खुल्ला दिशामुक्त वडा घोषणा, भइसकेको छ भने नेपाल सरकारको मापदण्डको आधारमा तयार भएको बालमैत्री स्थानीय शासन घोषणा गर्न आवश्यक ५१ वटा सूचकहरूमध्ये ४९ वटा सूचक पूरा गरेको जानकारी दिनुभयो ।
बालमैत्री शासनयुक्त वडा घोषणा कार्यक्रमलाई सफल बनाउन सबैलाई आआफ्नो स्थानबाट सहयोग र सहभागिता जनाउन वडा अध्यक्ष थापाले आग्रह गर्नुभएको छ।
